- రైతులకు మాజీ సీఎం కేసీఆర్ భరోసా
- రైతన్నలు ఏడుస్తుంటే ఢిల్లీలో రేవంత్ షికార్లు
- లక్షల ఏక‌రాల‌లో పండ ఎండినా.. ప‌ట్టించుకోని కాంగ్రెస్ సర్యారు
- జనగామ, సూర్యాపేట, న‌ల్గొండ జిల్లాలో ఎండిన పంట‌ను ప‌రిశీలించిన కేసీఆర్
జనగామ, (మన చౌరాస్తా) : అన్నదాతకు అండగా నిలిచేందుకు బీఆర్‌ఎస్‌ అధినేత కేసీఆర్ పొలంబాట పట్టారు. రైతుకు బాసటగా నిలిచేందుకు, కాంగ్రెస్ పాలనలో అన్నదాతలు ఎదుర్కొంటున్న సమస్యలు తెలుసుకునేందుకు జనగామ, సూర్యాపేట, నల్లగొండ జిల్లాల్లో పర్యటించారు. ఇందులో భాగంగా ఆదివారం ఉద‌యం జనగామ జిల్లా దేవరుప్పల మండలం ధరావత్‌తండాలో ఎండిన వరి పంట పొలాలను మాజీ సీఎం కేసీఆర్ పరిశీలించారు. ఆయన వెంట మాజీ మంత్రులు ఎర్రబెల్లి దయాకర్ రావు, సత్యవతి రాథోడ్, శ్రీనివాస్ గౌడ్, జనగామ ఎమ్మెల్యే పల్లా రాజేశ్వర్ రెడ్డి, బండ ప్రకాష్ ఎమ్మెల్సీ రవీందర్ రావు, క్యామ మల్లేశం తదితరులు ఉన్నారు. కలిసి ఎండిన ఈ సందర్భంగా మాజీ సీఎం రైతులు బానోతు వీరనాయక్, లోతు లక్ష్మణ్, గుగులోతు రాజమ్మ, ఆంబోతు సత్తమ్మ, పుల్సోతు ధరమ్ సింగ్‌తో ముచ్చటించారు.
ఈ సందర్భంగా ఆంబోతు సత్తమ్మ మాట్లాడుతూ 8 ఎకరాల వరి వేశానని సాగునీరు అందక ఆరు ఎకరాల పంట ఎండిపోయిందని గతంలో నాలుగు బోర్లు వేసి నష్ట పోయామని ఇప్పుడు పంట చేతికి వస్తుందనుకుంటే ఎండిపోయిందని ఆవేదన వ్యక్తం చేశారు. తమ కూతురి పెండ్లి చేద్దామనుకున్నామని ఇలాంటి నష్టం ఎదురైందని మీరే ఆదుకోవాలని, మీ ప్రభుత్వంలోనే సాగునీరు వచ్చిందని అన్నారు. దీంతో కేసీఆర్ స్పందిస్తూ పంట ఎండిన ప్రతి రైతును ప్రభుత్వం ఆదుకోవాలని తక్షణమే ఇచ్చిన హామీలను నెరవేర్చే విధంగా రైతుల పక్షాన ఉండి పోరాడుతానని రైతులు అధైర్య పడద్దని అండగా ఉంటానని భరోసానిచ్చారు. అదేవిధంగా ఆంబోతు సత్తమ్మ కుమార్తె వివాహానికి రూ.5 లక్షల ఆర్థిక సాయం అందించేందుకు మాజీ మంత్రి ఎర్రబెల్లి దయాకర్ కు సూచించారు. అనంత‌రం అక్కడి నుంచి సూర్యాపేట జిల్లా తుంగతుర్తికి చేరుకున్నారు. తుంగతుర్తితో పాటు అర్వపల్లి, సూర్యాపేట మండలంలో ఎండిన పంటలను కేసీఆర్ పరిశీలించారు. ఈ సందర్భంగా కెసిఆర్ మాట్లాడుతూ…రైతులకు అన్ని విధాల పార్టీ అండగా ఉంటుంద‌ని భరోసా ఇచ్చారు.. త‌మ‌ది రైతు ప్రభుత్వమ‌ని, అందుకే తమ ప్రభుత్వంలో రైతులంద‌రూ రారాజుల బ‌తికార‌న్నారు .కాంగ్రెస్ ప్రభుత్వం రావ‌డంతో మ‌ళ్లీ రైతుల బ‌తుకులు మొద‌టి కొచ్చాయంటూ కేసీఆర్ ఆవేదన వ్యక్తం చేశారు.
అడుగడుగన బ్రహ్మరథం
ఉద‌యం ఎర్రవల్లి వ్యవసాయ క్షేత్రం నుంచి బ‌స్సులో రోడ్డు మార్గాన జనగామ జిల్లాకు బయల్దేరిన కేసీఆర్‌కు.. అడుగడుగా ప్రజలు, బీఆర్‌ఎస్‌ కార్యకర్తలు బ్రహ్మరథం పట్టారు. బీఆర్‌ఎస్‌ అధినేతకు జనగామ, స్టేష్‌ఘన్‌పూఘన్‌ నియోజకవర్గ కార్యకర్తలు, ధరావత్‌తండా వాసులు ఘనస్వాగతం పలికారు. కేసీఆర్ వెంట ఎమ్మెల్యే పల్లా రాజేశ్వర్ రెడ్డి, మాజీ మంత్రులు ఎర్రబెల్లి దయాకర్‌రావు, సత్యవతి రాథోడ్, శ్రీనివాస్ గౌడ్, జ‌గ‌దీష్ రెడ్డి తదితరులు ఉన్నారు.
